ფინანსურ სექტორში IT სისტემების გამართული მუშაობა ბიზნესის წარმატებისა და უწყვეტობის განმსაზღვრელი ფაქტორია. ყოველი შეფერხება IT სისტემებში პირდაპირ აისახება მომხმარებელთა კმაყოფილებაზე, კომპანიის რეპუტაციასა და ფინანსურ შედეგებზე. სწორედ ამიტომ, IT ოპერაციების გუნდი წარმოადგენს თანამედროვე საფინანსო ინსტიტუტის ხერხემალს – გუნდს, რომელიც უზრუნველყოფს ციფრული სერვისების უწყვეტობას, მონაცემთა უსაფრთხოებას და ბიზნეს პროცესების შეუფერხებელ მიმდინარეობას.
კრისტალი, როგორც ერთ-ერთი წამყვანი ფინანსური ინსტიტუტი საქართველოში, წლებია წარმატებით ნერგავს ციფრულ ტექნოლოგიებს თავის საქმიანობაში. კომპანია, რომელიც დღეს მართავს 485 მილიონი ლარის სასესხო პორტფელს და ემსახურება 100,000-ზე მეტ მომხმარებელს 49 ფილიალის მეშვეობით, მუდმივად ზრუნავს ინოვაციური, მწვანე და სოციალურად ორიენტირებული ფინანსური პროდუქტების განვითარებაზე. კრისტალის ციფრული სერვისები საშუალებას აძლევს ფერმერებს, მიკრო და მცირე მეწარმეებს მარტივად და სწრაფად მიიღონ საჭირო ფინანსური მომსახურება.
კომპანიის მასშტაბების ზრდასთან ერთად, იზრდება IT ინფრასტრუქტურის კომპლექსურობაც.
ორგანიზაციის სრული ციფრული ტრანსფორმაციის პირობებში, IT ოპერაციების გუნდთან ყოველდღიურად შემოდის მოთხოვნები კომპანიის სხვადასხვა მიმართულებიდან. ამ მრავალფეროვანი ნაკადის მართვა, პრიორიტეტიზაცია და დროული რეაგირება მზარდ გამოწვევად იქცა გუნდისთვის.
რატომ შევარჩიეთ Kanban?
IT პროცესების მართვის მრავალი მეთოდოლოგიიდან, კრისტალის გუნდთან კოლაბორაციის შედეგად, სწორედ Kanban შევარჩიეთ. ეს არჩევანი ეფუძნებოდა რამდენიმე მნიშვნელოვან ფაქტორს: პირველ რიგში, Kanban-ის ევოლუციური ბუნება საშუალებას იძლევა არსებული პროცესები თანდათანობით გაუმჯობესდეს, რადიკალური ცვლილებების გარეშე. ეს განსაკუთრებით მნიშვნელოვანია ფინანსური ინსტიტუტისთვის, სადაც IT სერვისების უწყვეტობა კრიტიკულია. მეორე მხრივ, Kanban-ის ვიზუალიზაცია და შესაბამისი პროცესები იდეალურად ერგება IT ოპერაციების სპეციფიკას – მრავალფეროვანი დავალებების ნაკადის მართვას სხვადასხვა ბიზნეს მიმართულებიდან.
ტრენინგის პროცესი დაიგეგმა კრისტალის IT ოპერაციების გუნდის სპეციფიკის გათვალისწინებით. პირველ ეტაპზე გავაანალიზეთ არსებული სამუშაო პროცესები, გამოვავლინეთ ძირითადი გამოწვევები. შემდეგ, პრაქტიკული სავარჯიშოების მეშვეობით, გუნდმა ისწავლა Kanban-ის ძირითადი პრინციპების გამოყენება მათ რეალურ სამუშაო გარემოში. განსაკუთრებული ყურადღება დაეთმო WIP ლიმიტების განსაზღვრას და მართვას, რაც IT ოპერაციებში ერთ-ერთი კრიტიკული ფაქტორია ეფექტურობის გასაზრდელად.
ტრენინგის მნიშვნელოვანი ნაწილი დაეთმო რეალური ქეისების ანალიზს. გუნდმა გააანალიზა ტიპიური სცენარები – სასწრაფო თიქეთების მართვა, რესურსების გადანაწილება პიკური დატვირთვის დროს, პრიორიტეტების ცვლილებაზე რეაგირება. ყველა ეს სცენარი განვიხილეთ Kanban-ის პერსპექტივიდან და შევიმუშავეთ პრაქტიკული გზები მათ გადასაჭრელად. გუნდმა ასევე შეისწავლა Kanban მეტრიკების გამოყენება, რაც საშუალებას აძლევს მათ ობიექტურად შეაფასონ საკუთარი პროგრესი და გამოავლინონ გაუმჯობესების შესაძლებლობები.
განსაკუთრებით აღსანიშნავია პროცესების გამჭვირვალობის მკვეთრი გაუმჯობესება. Kanban დაფის ვიზუალიზაციამ საშუალება მისცა როგორც გუნდს, ისე მენეჯმენტს უკეთ დაენახათ სამუშაო ნაკადის დინამიკა. ეს კი, თავის მხრივ, დაეხმარა მათ რესურსების უფრო ეფექტურ განაწილებაში და პროაქტიულ რეაგირებაში პოტენციურ პრობლემებზე.
თუ თქვენს ორგანიზაციაშიც მსგავსი გამოწვევების წინაშე ხართ, მაშინ ჩავნიშნოთ კონსულტაცია და გავიაროთ დეტალურად თქვენი ქეისი.
